O espazo

A organización espacial na escola infantil debe realizarse atendendo ás necesidades dos nenos e as nenas (afectivas, de autonomía, de movemento, de socialización e de descubrimento, exploración, coñecemento e investigación).

Así pois, na aula débense conxugar espazos que proporcionen seguridade e estabilidade, favorecendo o contacto individual do/a pequeno/a coa persoa adulta, con outros que favorezan a autonomía, o movemento e a socialización. Así mesmo, debemos ofrecerlle ao alumnado contornos ricos en estímulos e experiencias, que fomenten a comunicación e que inviten á exploración, ao descubrimento e á actividade lúdica.

Por outra banda,  na organización do espazo non debemos obviar as necesidades das persoas adultas que interveñen no proceso educativo (profesorado, familias, persoal de administración e servizos...). Polo tanto, o centro debe contar con espazos reservados para o equipo educativo e o persoal non docente (zonas de traballo e reunión), e espazos destinados ao encontro coas familias, tanto de xeito individual como grupal.

Non debemos esquecer que a organización do espazo debe ser flexible e susceptible de modificacións segundo as necesidades que vaian xurdindo no grupo.

Así mesmo, a escola infantil debe proporcionar espazos seguros, confortables e atraentes, adecuados ao momento evolutivo dos nenos e as nenas.

O espazo debe estar coidadosamente preparado para a incorporación do alumnado, tendo en conta os criterios mencionados con anterioridade. No entanto, no período de adaptación implicar o alumnado na decoración e personalización da aula favorecerá a súa integración e o sentimento de pertenza ao grupo (decoración dos rótulos dos recunchos, personalización das perchas, etc.).

O noso centro conta cos seguintes espazos:

Espazos interiores:

• Recibidor, galería, corredores e servizos
• Dependencias para o profesorado e o persoal non docente
• Zona de encontro coas familias
• Sala de usos múltiples
• Aulas  dos diferentes grupos

Espazos exteriores:

• Patio exterior con areeiro
• Patio cuberto
• Horta

A Aula das Xoaniñas (3 anos) organízase nos seguintes espazos:

• Recibidor
• Zona de aseo con lavabo e inodoro
• Zona de asemblea (alfombra)
• Recuncho do xogo simbólico
• Recuncho da Biblioteca
• Recuncho da Plástica
• Recuncho das construcións
• Recuncho do movemento